ليش تكلي احبك؟

موضوع: ليش تكلي احبك؟ الخميس أبريل 22, 2010 7:09 am

ليش تكلي احبك؟بس بدون احساس
يعني شلون ماافهم صرت قصدك

اذا ودك تتغير كلي دون اسرار
لتحبني بكلامك حبني بودك

من يوم السألتك واني مامرتاح
ولاعيني غفت من اسمعت ردك

اكضي الليل صافن واحجي وياي
ابرر موقفك واتعذر لصدك

يتراوالي المحبة تزيد يوم بيوم
ويحسدني اليشوفك يمي ويحسدك

عجيبة شبيك تبتعد من امرن بيك
وليش تضم علي كل عطرك ووردك

جرفك اني يابحر الحسن مشتاك
صار هواي مامر للجرف مدك

صار هواي ادور بينك انت وبيك
بلكي الكاك بيك وودك يردك

مالومك الك بس اني هم معذور
ماتعرف همومي بهل الوكت بعدك

صدكني الوكت وك لعب دورة وياي
والدنيا بغفل من حالي باكتني

زرعتني بجروح وضوكتني الويل
وتعب فوك التعب ويايهه تعبتني

غسلتني بدمع وبليل وبكابوس
ولمن كملت بالنار شرتني

جرحتني وكبر بية الجرح اضعاف
وسموم الدهر داوتني

ومن ملت ولك فلت ضمادي بساع
وبحلك الجرح مجروح خلتني

حبيت الحياه برغم كل الجور
بس دنياي ابد مايوم حبتني

اذا ودك ارد حقك واني الغلطان
واعذرك لو رحت شو كلها عافتني

واذا عني رحت مر بية كلما انام
لان بجفوني صورة وياك رسمتني

اضل كل عمري نايم واعكد الجفنين
اذا طيفوك حلم وبليلة مرتني

منقول
تحياتي
اسير الحب